कोरोना नियन्त्रण तथा रोकथाममा सरकार संवेदनशील नभएको कांग्रेसको निष्कर्ष
काठमाडौं । प्रमुख प्रतिपक्षी नेपाली कांग्रेसले कोरोना नियन्त्रण र रोकथाम गर्न सरकार संवेदनशील नभएको निष्कर्ष निकालेको छ । पार्टी कार्यालय सानेपामा सोमबार बसेको केन्द्रीय कार्यसमिति बैठकले कोरोनालाई नियन्त्रण गर्न सरकार पूर्णरुपमा असफल भएको भन्दै गैरजिम्मेवार र संवेदनशील नभएको निष्कर्ष निकालेको हो ।
बैठकले तत्काल स्वास्थ्यकर्मी, सुरक्षाकर्मी लगायत अग्रपंक्तिमा रहेर काम गर्नेका लागि व्यक्तिगत सुरक्षा र जाँचको व्यवस्था गर्न माग गरेको छ । त्यस्तै क्वारेन्टाइनको गुणस्तर बृद्धि गर्ने तथा अस्पतालमा बेडको संख्या बढाउन पनि कांग्रेस सरकारको ध्यानाकर्षण गराएको छ । त्यस्तै कांग्रेस सबै परीक्षण पीसीआर बिधिबाट गर्न पनि माग गरेको कांग्रेस नेता रमेश लेखकले जानकारी दिए ।
बैठकले कोरोन जाँच नगरि क्वारेन्टाइनबाट घर पठाउने सम्बन्धी कार्यादेश तत्काल परिमार्जन गरि कोरोना पूर्णरुपमा निको भएपछि मात्र घर पठााउनुपर्नेमा जोड दिएको छ । त्यस्तै विदेशमा रहेका नेपालीलाई सुरक्षित रुपमा घर ल्याउने तथा भारतबाट नेपाली ल्याउने क्रममा नेपालीमाथि भएको व्यवहार तत्काल सुधार्न पनि सरकारलाई सुझाव दिएको छ ।