प्रधानमन्त्रीको चीन भ्रमणको परराष्ट्रद्वारा औपचारिक जानकारी, ओलीले पेकिङ विश्विविद्यालयमा सम्बोधन गर्ने
काठमाडौं । परराष्ट्र मन्त्रालयले प्रधानमन्त्री केपी शर्मा ओलीको चीन भ्रमणको औपचारिक जानकारी गराएको छ । शुक्रबार परराष्ट्र मन्त्रालयले विज्ञप्ति जारी गरी प्रधानमन्त्री ओलीको चारदिने भ्रमणको औपचारिक घोषणा गरेको हो ।
चिनियाँ प्रधानमन्त्री ली छ्याङको निमन्त्रणमा ओली मंसिर १७ गते चीन प्रस्थान गर्नेछन् भने २० गते स्वदेश फर्किनेछन्। प्रधानमन्त्री ओलीले चीन भ्रमणका क्रममा चिनियाँ राष्ट्रपति सी चिनफिङलगायत शीर्ष नेताहरूसँग भेटघाट गर्नेछन्। प्रधानमन्त्री ओलीले पेकिङ विश्विविद्यालयमा सम्बोधन गर्नेछन्।
यसैगरी उनी अन्य विभिन्न कार्यक्रममा सहभागी हुनेछन् । बिहीबार बसेको मन्त्रिपरिषद् बैठकले प्रधानमन्त्री ओलीको चीन भ्रमण स्वीकृत गरेको थियो। प्रधानमन्त्री ओलीको चीन भ्रमण टोलीमा ८७ सदस्य सहभागी हुनेछन् ।
