आत्मदाहको निर्णय हिजोदेखिको निराशा र पीडाको परिणाम होः गृहमन्त्री
काठमाडौं । उपप्रधान तथा गृहमन्त्री रवि लामिछानेले प्रेम आचार्यको आत्मदाहको निर्णय फेर्न नसक्नुमा आफूहरु दोषी रहेको बताएका छन् ।
बुधबार सामाजिक संजालमार्फत गृहमन्त्रीले नयाँ राजनीतिक दल र नेताको रुपमा आशा जगाउन नसकेको भन्दै दुःख व्यक्त गरेका छन् ।
उनले भनेका छन्, ‘दुःख त मलाई यसमा लागेको छ कि हामी जस्ता नयाँहरुको आगमनले समेत तपाईँमा उत्साह थप्न सकेन, आशा जगाउन सकेन, आत्मदाहको निर्णय फेर्न सकेन । यसमा हामी दोषी छौं, म दोषी छु । प्रेम आचार्य जी, नयाँ राजनीतिक दल र नेताको रुपमा तपाईँमा आशा जगाउन सकिनौं, हामीलाई माफ गर्नुहोला । तपाईंको आत्माले चीरशान्ति पाओस् ,परिवारलाई यो पीडा सहने शक्ति मिलोस्।’
गृहमन्त्रीले आत्मदाहको निर्णय हिजोदेखिको निराशा र पीडाको परिणाम भएको उल्लेख गरेका छन् ।
उनले भनेका छन्, ‘एउटा नागरिकले अत्मदाह गर्नु पर्ने परिस्थितिको वर्णन गर्न अब के नै बाँकी रह्यो र। यस्तै परिस्थितिका कारण शान्त बिद्रोह गरेर हामी हिजो भर्खर राजनीतिमा र आज भर्खर सरकारमा सामेल छौं । मलाई थाहा छ, आत्मदाहको निर्णय हिजोदेखिको निराशा र पीडाको परिणाम हो।’