महाभियोग सार्वभौम संसदको सम्पत्ति हो, आउने प्रतिनिधिसभामा छलफल भएर निर्णयमा पुग्छः संचारमन्त्री
काठमाडौं । सरकारले प्रधानन्यायाधीश चोलेन्द्रशम्सेर जबराबिरुद्धको महाअभियोग प्रस्ताव नयाँ प्रतिनिधिसभामा छलफल हुने बताएको छ ।
बुधबार मन्त्रिपरिषद बैठकका निर्णय सार्वजनिक गर्न आयोजित पत्रकार सम्मेलनपछि पत्रकारहरुसँग कुरा गर्दै सरकारका प्रवक्ता एवं सञ्चार तथा सूचना प्रविधिमन्त्री ज्ञानेन्द्रबहादुर कार्कीले प्रधानन्यायाधीश जबराबिरुद्धको महाअभियोग नयाँ संसदमा छलफल हुने बताएका हुन् ।
उनले महाअभियोग माथि छलफल भएको प्रतिवेदन नयाँ गठित प्रतिनिधिसभामा छलफल हुने विषय जीवित रहेको बताए । उनले महाअभियोग सार्वभौम सम्पन्न संसदको सम्पत्ति भएको बताए ।
उनले भने,‘जहाँसम्म प्रतिनिधिसभामा चोलेन्द्र शम्सेर जबराबिरुद्ध महाअभियोग माथि छलफल भएर त्यो छलफलको प्रतिवेदन गठित अर्को प्रतिनिधिसभामा छलफल हुने विषय जीवितै छ । महाअभियोग सार्वभौम सम्पन्न संसदको सम्पत्ति हो । यसको छलफल अब आउने प्रतिनिधि सभामा छलफल भएर निर्णयमा पुग्छ ।’
मन्त्री कार्कीले अबको प्रतिनिधिसभामा छलफल भएर मात्रै प्रधानन्याधीशमाथिको महाअभियोगको टुंगो लाग्ने बताए ।
