कांग्रेस नेता थापाद्वारा महामन्त्रीमा उम्मेदवारी दिने घोषणा
काठमाडौँ । नेपाली कांग्रेसका नेता गगन थापाले पार्टीको १४औं महाधिवेशनमा महामन्त्रीमा उम्मेदवारी दिने घोषणा गरेका छन् । सोमबार काठमाडौं महानगरपालिका–३० को कार्यकर्ता भेलालाई सम्बोधन गर्दै थापाले महामन्त्रीमा उम्मेदवारी घोषणा गरेका हुन् ।
उनले भने,‘ उम्मेदवारी घोषणाका लागि योभन्दा अर्को पवित्र स्थान हुँदैन । मेरो वडा र अग्रजहरूबीचमा बडो गौरवका साथ १४औं महाधिवेशनमा नेपाली कांग्रेसको महामन्त्रीको उम्मेदवार घोषणा गर्छु ।’
१३औं महाधिवेशनमा पनि थापा महामन्त्रीमा उम्मेदवार बनेका थिए । तर त्यतिबेला उनी पराजित भएका थिए । कांग्रेसको १४औं महाधिवेशन आगामी मंसिर ९ देखि १३ गतेसम्म काठमाडौंमा गर्ने तय भएको छ ।
