१४ सांसदलाई तत्काल कारबाही गर्न सभामुखसँग एमालेको माग
काठमाडौं । नेकपा एमालेले पार्टीका १४ जना सांसदलाई कारबाही गर्न सभामुख अग्निप्रसाद सापकोटाको ध्यानाकर्षण गराएको छ ।
बिहीबार सभामुखलाई भेटेर नेकपा एमालेका सांसदहरुले नेकपा एमाले (समाजवादी) दल दर्ताका लागि निर्वाचन आयोगमा निवेदन दिएको माधव कुमार नेपाल पक्षका १४ जना सांसदलाई तत्काल कारबाही गर्न माग गरेको हो ।
सभामुख सापकोटालाई भेटेपछि पत्रकारहरुसँग कुरा गर्दै एमाले नेता विशाल भट्टराईले सभामुख सापकोटाले तत्काल कारबाही गर्छु भन्ने आश्वासन दिएको जानकरी दिए ।
भट्टराईले अरु दलका नेतालाई तत्काल कारबाही गरेपनि ७२ घण्टा बित्न लाग्दासमेत नेकपा एमालेले कारबाही गर्न पठाएका १४ जना नेताहरुलाई कारबाही गर्न विलम्ब गरिरहेको बताए ।
उनले विलम्ब गरेर निर्वाचन आयोगमा दल दर्ता सकेपछि सूचना दिए त्यो गैरकानूनी, गैर संवैधानिक, वदनियत र नेकपा एमालेलाई जसरी पनि टुक्राउँछु भन्ने नियत रहेको बताए । नेपाल पक्षको दल दर्तापछि मात्रै सभामुखले कारबाही गर्छु भन्ने सोचेको भए एमाले चुप लागेर नबस्ने उनले चेतावनी दिए ।