‘गल्ती स्वीकार गरेर आउनुहुन्छ भने केपी ओलीलाई स्वागत नै गर्नुपर्छ है शेरबहादुरजी’
काठमाडौं । नेकपा एमालेका वरिष्ठ नेता माधवकुमार नेपालले देशलाई भड्खालोमा जानबाट रोक्न कोर्स करेक्सन गर्नुपर्ने बताएका छन् ।
बिहीबार सम्पादकहरुसँगको अन्तरक्रियामा वरिष्ठ नेता नेपालले अब कोर्स करेक्सन गरेर जानुपर्ने बताएका हुन् । उनले प्रधानमन्त्री केपी शर्मा ओलीले गल्ती स्वीकार गरेर कोर्स करेक्सन गर्न चाहे स्वागत गर्नुपर्ने बताए ।
उनले भने, ‘हामीले कोर्स करेक्सन गर्न चाहिरेका छौँ । केपी ओलीले सङ्कोचमा लानुभएको छ । हामी यसलाई पोजेटिभ दिशामा लान खोजिरहेका छौँ । मानिस हुन् । कहिलेकाहीँ गल्ती हुन्छ । गल्ती स्वीकार गरेर आउनुहुन्छ भने केपी ओलीलाई स्वागत नै गर्नुपर्छ है शेरबहादुर जी । म ठाउँ छोड्दिन्छु ।’ उनले संसद् विघटन गरेर मुलुकलाई अनिश्चततातर्फ अहंकारका कारण धकेलिएको बताए ।
देशको स्वाधिनता, स्वाभिमान र राष्ट्रहितको रक्षाका लागि संघर्ष गरिरहेको भन्दै नेता नेपालले ओलीको अहंकारले संसद विघटन गरेपनि यसलाई सच्याउन सकिने बताए । उनले भने, ‘देश जोगाउने अभिभारा तपाइँहरुको हो, हाम्रो हो, हामी सवैको हो ।’
