प्रधानमन्त्रीलाई संसद विघटन गर्ने अधिकार संविधानले दिएको छैनः सभामुख
काठमाडौं । विघटित प्रतिनिधिसभा पुनःस्थापनाको माग गर्दै चार महिला संघले सभामुख अग्निप्रसाद सापकोटालाई ध्यानाकर्षण पत्र बुझाएका छन् । बिहीबार अखिल नेपाल महिला संघ (अनेम संघ), समाजवादी महिला संघ नेपाल,अखिल नेपाल महिला संघ र विवेकशील साझा महिलाले प्रतिनिधिसभा पुनःस्थापनाको माग गर्दै सभामुख सापकोटालाई ध्यानाकर्षण पत्र बुझाएका हुन् ।
ध्यानाकर्षण पत्र बुझ्दै सभामुख सापकोटाले अहिलेकै अवस्थामा संसद विघटन हुन नसक्ने भन्दै संविधानको रक्षाका लागि आफूले खेल्नुपर्ने भूमिकाबारे सबै पक्षसँग परामर्श र छलफल गरिरहेको बताए । प्रधानमन्त्रीलाई संसद विघटन गर्ने अधिकार संविधानले नदिएको भन्दै सभामुख सापकोटाले आफ्नो धारणा पहिले नै सार्वजनिक गरिसकेको बताए ।
त्यस्तै उनले संविधानको रक्षा तथा देश र जनताको अधिकतम हितमा सधैं समर्पित हुने विश्वास दिलाए । चार महिला संघले संविधानले कल्पनै नगरेको परिस्थिति र दिदै नदिएको अधिकार प्रयोग गरेर संविधान विघटन गरिएको भन्दै संसद पुनःस्थापना गर्न माग गरेका छन् ।
प्रतिनिधिसभा पुनःस्थापना गर्न नसकिए संविधान र आमनेपाली जनताको भावना विपरित हुने उनीहरुले ठहर गरेको छ । उनीहरुले भविष्यमा हुने कुनैपनि प्रधानमन्त्रीले आफ्नो निजी स्वार्थ पूरा गर्न बारम्बार प्रतिनिधिसभा विघटन गर्ने नजिर रहने सम्भावना बढ्ने तर्फ ध्यानाकर्षण गराएका छन् ।
