चिनियाँ सेनासँगको भिडन्तमा मृत्यु हुने भारतीय सैनिकको संख्या २० पुग्यो
भारतीय र चिनियाँ सैनिकबीच लद्दाखको विकट गलवान उपत्यकामा भएको झडपमा कम्तीमा २० भारतीय सैनिकको मृत्यु भएको छ । बीबीसीका अनुसार दुई देशका सैनिकबीच भएको झडपमा परी कम्तीमा २० भारतीय सैनिकको मृत्यु भएको छ । मंगलबार दिउँसो झडपमा तीन भारतीय सैनिकको मृत्यु भएको समाचार सार्वजनिक भएको थियो ।
तर भारतीय संचारमाध्यमले भने चिनियाँ सेनातर्फ पनि ठूलो क्षति भएको दाबी गरेका छन् । उनीहरुले झडपमा ४३ चिनियाँ सैनिकको मृत्यु भएको दाबी गरेका छन् । तर यसबारेमा चीनले केही बताएको छैन । भारत र चीनबीच सीमामा लामो समयदेखि तनाव हुँदै आएको भए पनि धेरैपछि सैनिकहरूको मृत्यु हुनेगरी सङ्घर्ष भएको हो । चीनले भारतलाई तनाव बढ्नेगरी कुनै काम नगर्न आह्वान गरेको समाचारसंस्था रोएटर्सले जनाएको छ।