दिल्लीमा भएको हिंसात्मक झडपमा परी मृत्यु हुनेको संख्या ३२ पुग्यो, सयौं घाइते
नागरिकता संशोधन कानुनको समर्थन र विरोधमा भएको प्रदर्शनले हिंसाको रुप लिएपछि भारतको दिल्लीमा मृत्यु हुनेको संख्या ३२ पुगेको छ । समाचार एजेन्सी पीटीआईले स्वास्थ्य विभागका एक वरिष्ठ अधिकारीलाई उद्धृत गर्दै हिंसाका कारण मृत्यु हुनेको संख्या ३२ पुगेको बीबीसी हिन्दीले जनाएको छ ।
दिल्लीको गुरु तेग बहादुर अस्पताल (जीटीबी अस्पताल) मा ३० जनाको र लोक नायक जयप्रकाश नारायण अस्पताल (एलएनजेपी अस्पताल) मा दुई घाइतेको मृत्यु भएको बीबीसी हिन्दीले जनाएको छ । चार दिनदेखि दिल्लीको उत्तर पूर्वी क्षेत्रमा जारी हिंसामा सयौंको संख्यामा मानिसहरु घाइते भएका छन् ।
नागरिकता संशोधन कानुनविरुद्ध ठूलो संख्यामा प्रदर्शन गरिरहेका नागरिकले आइतबार सडक अवरुद्ध गरेका थिए । सडक अवरुद्ध गरिएपछि जाफराबादमा उक्त कानुनको समर्थन गर्दै आएका नागरिकको समूह र विरोध गरिहरेको समूहबीच झडप सुरू भएको थियो ।