न्यायको माग गर्दै द्वन्द्वपीडितहरुद्वारा काठमाडौंमा प्रदर्शन
काठमाडौं । द्वन्द्व पीडितहरुले सरकारसँग न्यायको माग गर्दै बिहीबार काठमाडौंमा प्रदर्शन गरेका छन् । वेपत्ता आफन्तको अवस्था अझै सार्वजनिक नगरिएको उल्लेख गर्दै उनीहरुले काठमाडौंको माईतीघर मण्डलामा सरकारविरुद्ध प्रदर्शन गरेका हुन् ।
विस्तृत शान्ति सम्झौंत पूरा भएको १३ वर्ष पुगेको अवसर पारेर प्रर्दशनमा उत्रिएका उनीहरुले वेपत्ता आफन्तको अवस्था तत्काल सार्वजनिक गर्न, पीडितलाई तत्काल परिपुरणको व्यवस्था गर्न तथा पीडिकमाथि कडा कार्वाही गर्न सरकारलाई दवाव दिए ।
द्वन्द्वपीडित साझा चौंतारीका अध्यक्ष भागिराम चौंधरीले द्वन्द्वकालका पीडितलाई न्याय दिन र दोषीमाथि कडा कार्वाही गर्न सरकारसँग माग गर्दै १३ वर्षपछि पनि विरोध प्रदर्शनमा उत्रनु परेको बताए ।
उनले विस्तृत शान्ति सम्झौता भएको १३ वर्ष पुग्दा पनि पीडितलाई न्याय दिने काम नगरेको भन्दै सरकारप्रति आक्रोश व्यक्त गरे । उनीहरुले वेपत्ता आफन्तको स्थिति तत्काल सार्वजनिक गर्न पनि सरकारलाई आग्रह गरेका छन् ।
अध्यक्ष चौंधरीले पीडितहरुको न्यायका लागि गठन गर्न लागिएको सत्य निरुपण तथा मेलमिलाप आयोग र वेपत्ता छानवीन आयोग गठन प्रक्रियामा ढिलाई नगर्न सरकारको ध्यानाकर्षण गराएका छन् ।
